In kasta oo ay hooyooyinku badankoodu aad ugu hanweyn yihiin in dhalaankooda ay siiyaan bilaha ugu horreeya cuntooyin caafimaad leh oo ku habboon, haddana qaarkood ayaa si aan ula kac ahayn dhalaankooda u siiya cuntooyinka khatarta ah ee u keeni kara waxyeello, khatar gelin karana nolosha dhalaanka bilaha ugu horreeya.
Ugu horreayn, aan ogaanno in dhalaanka bilaha ugu horreeya (0-6 bilood) la siiyo wax cunto ah ay gabi ahaanba bannaanayn, sida ay sheegeen Hay’adda Caafimaadka Adduunka, sababtoo ah hab-dhiska dheefshiidka jidhkiisu ma awoodo inuu cuno wax cunto ah 6 bilood ka hor, waxaana nafaqo ahaan kaga filan naasnuujinta la siiyo.
Waa Kuwan Qaar Ka Mid Ah Cuntooyinka Khatarta Ah, Ayna Tahayna In Aad Ka Fogayso Dhalaankaaga
- Malabka
Inkastoo hooyooyinka qaar malabka u arkaan in uu yahay cunto dabiici ah oo faa’iido u leh ilmaha jirkiisa, gaar ahaan marka ay doonayaan in ay macaaneeyaan cuntada iyaga oo aan isticmaalin sonkor, haddana malabku wuxuu ka mid yahay cuntooyinka khatarta ah ee khatar galin kara nolosha dhalaanka gebi ahaanba sannadka ugu horreeya, sababtoo ah waxa ku jira bakteeriyada Clostridium botulinum, taasoo sababta in ay soo saarto jeermis khatar ku ah nolosha dhalaanka.
Waxaana talo ah inaad ilmahaaga ka fogayso malabka in muddo ah, sababtoo ah marxaladan waxaa waxwalba nooga muhiim ah caafimaadkiisa, waxaana la doorbidaa in malabka laga fogeeyo ilaa sanadka labaad ugu yaraan.
- Caanaha Lo’da
Caanaha lo’du waa mid ka mid ah cabitaanada ugu waa-wayn ee ay tahay in aan la siin dhalaanka ilaa sanadka ugu horreeya, gaar ahaan inuusan noqonin bedelka naaska hooyada ama caanaha la qoosho, taa bedelkeeda waxaa la doorbidaa in la siiyo cuntooyinka fud-fudud (hadii ay ka fursan waydo), sababtoo ah hab-dhiska dheefshiidka jidhkiisu ma dheefi karo borotiinada ku jira caanaha lo’da.
Caanaha lo’du waxay ka kooban yihiin xaddi macdan ah oo dhaawici kara kelyaha dhalaankaaga.
- Saloolka (Daangada)
Saloolka (Daangada) ayaa gabi ahaanba loo diidaa inay cunaan caruurta yar-yar, gaar ahaan dhalaanka da’dooda ay ka yar tahay 6 bilood. sababtoo ah waxay keentaa xaalado badan oo neef-qabatin ah, maadaama saloolku mararka qaar (hadaysan u badnayn) uu la socdo galley aan si fiican u bislaan, dhici kartana inuu cunaha kaga dhago, taasoo keeni karta neef yari.
- Qaybaha Waa-Weyn Ee Khudaarta Iyo Midhaha
Hooyooyinka qaar ayaa u jar-jara khudaarta iyo midhaha qaybo waa-weyn si uu ilmuhu u qabsado marka uu cunayo, (Ka Digtoonow Arrintan), waayo waa mid ka mid ah sababaha ugu waa-weyn ee keena neef-qabatinka, iyo in uu ilmuhu ku adkaato liqitaanka. Markaa waxaa lagu taliyaa in jar-jaritaanka lagu jaan-gooyo cabbir uu liqi karayo.
- Cuntooyinka Xasaasiyadda U Leh Dhalaankaaga
Dhakhaatiirtu waxay waalidiintu kula talinayaan gaar ahaan hooyooyinka inay dib u eegaan cuntooyinka xasaasiyadda ku keeni kara dhalaanka ilaa sanadka ugu horreeya, sida kalluunka, shukulaatada, muuska, strawberries, lawska, iyo daqiiqda cad. Waxaana laga yaabaa inaadan si toos ah u ogaan saameyntooda, laakiin hadii aad dhan kale ka eegto waxaa laga yaabaa ama ay badan tahayba inay dhibaato ku keenaan caafimaadkiisa, sidaa darteed ka ilaali ilmahaaga cuntooyinka xasaasiyadda u keeni kara ugu yaraan sanadka ugu horeeya.