Hooyooyinku waxay inta badan ka cawdaan hab-dhaqanada ubadkooda ee “aan la aqbali karin”, iyagoo midwalbaa midka kale uu garaacayo marar badanina ay isku qaylinayaan, waana nooc ka mid ah hab-dhaqanada ubadka, waalidiin badan ayaana raadiya xalal ay kula tacaalayaan hab-dhaqanadan, hase ahaatee in yar oo ka mid ah ayaa ku guulaysta inay xalliyaan.
Dhibaatadu Horta Ma Waxay Ka Taagan Tahay Hab-Dhaqanku Inuu Yahay “Mid Aan La Aqbali Karin” Mise Inuu Yahay “Mid Aan La Fahmi Karin”?
Waxaa badanka la sheegaa in dhibaatada ugu weyn aanay ahayn hab-dhaqanka ubadka, ee ay tahay faham la’aanta ubadka, gaar ahaan faham la’aanta haysata hooyada iyo qoyska.
Hab-dhaqan kastaana wuxuu leeyahay micno iyo ujeedo u gaar ah, hooyooyinka qaar ayaana taa dib ka ogaada, iyagoo xilli danbe gar-waaqsada in ilmahani aanuu ahayn mid “wax xumeeya” ee uu yahay mid “wax sahamiya”.
Intaa ka dib, hooyadu marka ay fahamto hab-dhaqanka ubadkeeda iyo sida ay ula dhaqmi lahayd qof walbaaba si ku habboon, waxa ay dareentaa degenaanshiyo, taasoo hoos u dhigaysa dhibaatooyinka maalinlaha ah, saamaynaysana hab-dhaqanka iyo akhlaaqda ubadkeeda.
Qaar Ka Mid Ah Hab-Dhaqanada Ubadka Iyo Sida Loo Fassiro
- Inuu kala saar-saarid badan yahay
Haddii ilmahaagu uu jecel yahay wax kala-soocidda, baadhista iyo sahaminta walxaha sida kala-saaridda waxyaabaha lagu ciyaaro, ama isku-dubaridkooda si waafaqsan midabka, cabbirka iyo qaabka, tani macnaheedu maaha in ilmahaagu uu yahay mid wax xumeeya oo burburiya alaabtiisa, isla mar ahaantaana aan wax qiimo ah ugu fadhinin.
Taa bedelkeeda waa ilmo soo jeeda, oo aad u feejigan, jecelna tafaasiisha iyo faahfaahinta, taasoo ina tusinaysaa in ilmahani uu hal-abuur ku yahay xisaabaadka iyo waxyaabaha la xidhiidha sayniska.
- Inuu hadal badan yahay
Waxaa dhacdo ah in ilmahaagu uu hadal badan yahay, kana sheekeeyo sheekooyin male-awaal ah oo aan wax run ah ku salaysnayn, isagoo sheekooyinkan uga sheekeeya asxaabtiisa iyo walaalihiisa, iskuna dayo inuu ka dhaadhiciyo.
Dabcan waxaa la odhan karaa ilmahani inuu yahay mid “beenaale” ah, laakiin hadii aan dhan kale ka eegto, waa ilmo leh shakhsi hogaamineed, hadal karna ah, awoodna u leh in uu dadka wax ka dhaadhiciyo.
Sidaa darteed ka waalid ahaan waa inaad ku dhiirigalisaa wax-akhriska, qoraalka, iyo ku dhawaaqidda ereyada si saxan, sidoo kale waxaa iyaduna lama huraan ah inaad ku baraarujiso inuu iska dhaafo beenaha uu ku lifaaqayo hadaladiisa, ayna tahayna inuu ka run sheego.
- Inuu sahamin badan yahay
Ilmahani waa ilmo doonaya inuu sahamiyo wax kasta oo ku xeeran, waxaana badanka aragnaa isaga oo taabanaya badhamada qaybisada (fiishta) iyo furayaasha isla mar ahaantaana uu ku celiyo sidii ay markii hore ahaayeen.
Waxayna tani natusinaysaa inuu ilmahani yahay mid hal-abuur leh, oo ku fiican wax curinta, iyo naqshadaynta.
- Inuu mas’uuliyad isa-saaro
Waxaa jira caruur mas’uuliyad isa saarta oo u heelan xalinta dhibaatooyinkooda, isla markaana leh fikrado iyo go’aamo adag, runtii hab-dhaqankan wuxuu muujinayaa in ilmahani ay u badan tahay inuu noqon doono hogaamiye bulsheed, ama marka ay ugu yar tahay inuu wax kala abaabuli karayyo.
Gabagabadii…
Kuwani waxay ahaayeen qaar ka mid ah hab-dhaqanada ubadka, oo ay waaliintu badankooda u fassirtaan si khaldan.
Waxaanna halkan ku baraarujinayaan (mar koowaad iyo mar labaadba) in la ogaado hab-dhaqanada ubadka, lana isku dayo in si qoto dheer leh loo fahmo, ayna tahayna in aan lagu degegin xukminta.
Si aan u ogaanno hab-dhaqanada ubadka, waa inaan su’aalo iska weydiino, maxay yihiin ujeeddooyinkooda? Waa maxay fariinta ay isku dayayaan inay muujiyaan, markaa ka dib waxaan ogaanaynaa tubta toosan ee loo-la dhaqmo.