Waalidiin badan ayaa is weydiiya su’aashan, iyagoon waliba badankoodu jawaab u hayn Muxuu Ilmahaygu Isku Garaacayaa? Ama Muxuu Madaxiisa Darbiga Ugu Dhufanayaa?
Ugu horrayn, hab-dhaqan kastaa oo uu ku dhaqmo ubadku waa hab ama qaab uu ku muujinayo dareemihiisa iyo waxa u gaark ah, sidaa darteed waxaa laga yaabaa inuu ilmahaagu niyad jabsan yahay marka uu is garaacayo, ama uu diidan yahay shay gaar ah, ama uu rabo in codsigiisa loo fuliyo, amaba waxaa dhici karta inuu isku dhiirigalinayo ama uu isku ciqaabayo sida (hadii uu sameeyay fal aan habboonayn, ama hadii uu illoobay dardaaran la-la dardaarmay, ama uu garan waayay cashir uu maantoo dhami ku cel-celinayay).
Laakiin se hadaanii caddayn sababta uu isku garaacayo, waxaa waalidiinta la gudboon inay fiiro gaar ah u yeeshaan ubadkooda, oo ay wakhti la qaataan ugu yaraan todobaad, oo ay qoraan fal kasta oo ka danbeeya is garaacistan.
Tusaale ahaan, falkan miyuu maalintii dhacaa wakhti gaar ah? Mise marka uu qabanayo hawl gaar ah? Mise marka uu la kulmo fal ama xaalad gaar ah? Mise marka uu joogo meel ama aag gaar ah? Mise marka uu horjoogo ama uu hortaagan yahay qof gaar ah?
Qorista su’aalahan jawaabahooda waxay gacan weyn ka geysan karaan in la ogaado sababta ka danbaysa hab-dhaqankan is garaacista ah, si ugu danbayntii loo xalliyo.
Qormadeenan maanta waxaynu ka jawaabaynaa su’aal ay waalidiin badani is weydiiyaan taasoo ah muxuu ilmahaygu isku garaacaa, waxaana halkan ah 3 sabab oo keenaysa in uu is garaaco.
- Muujin La’aan
Waxaa laga yaabaa ilmahaagu inuu dareemayo dareemo ka waa-weyn oo xad dhaaf ah, – sida xanaaqa, hinaasaha, cabsida, jahawareerka, ama xishoodkaba – laakiin aanu weli fahmin sidii uu u muujin lahaa una la tacaali lahaa dareemahan, waxaan xal u noqonaysa in uu is garaaco, sababtoo ah waa habka kaliya ee uu ku muujinayo dareemihiisa iyo waxa ka socda maskaxdiisan yar.
Waxaa kaloo laga yaabaa inay ka cadhoodaan naftooda sababtoo ah waxay awoodi waayeen inay muujiyaan dareemahooda, sababtan awgeedna xalku wuxuu noqday inay is garaacaan.
- Rabitaan Ah In La Dareemo
Carruurta yaryar waxay jecel yihiin inay dadka ku xeeran ka helaan dareen buuxa, waxayna wax kasta u samayn doonaan si ay u helaan dareenkaas.
Haddii aad dareen-celin weyn ka bixisay markii ugu horreysay ee uu is-garaacay, waxaa laga yaabaa inay ku soo celiyaan hab-dhaqankaas, si ay mar kale kaaga helaan fal-celin la mid ah tii hore.
- Xanuuno Jiro Awgeed
Haddii ilmahaagu qabo xanuunka dhegta ama xanuunka ilkaha oo ay u dheer tahay xanaaq, laakiin se aanuu si ku filan u sheegi karin, waxaa laga yaabaa inuu is-garaaco si uu u muujiyo inuu aad u xanaaqsan yahay.