Inaad hooyo noqotid ma ahan go’aan fudud, gaar ahaan wakhti xaadirkan, haddii aad go’aansato inaad noqoto “HOOYO” waa inaad ku dhiirataa inaad wax badan ka tanaasusho oo ay ugu horrayso, hurdadaada, yoolalkaaga gaarka, isticmaalka baraha bulshada ee faraha badan, qaab nololeedkaagii hore, iyo qaar kaloo badan.
Qaabka ay dunidu hadda u dhisan tahay waa qaab adag, iyadoo dumarka qaar, gaar ahaan kuwa garaadka badan u diidaysa inay noqdaan hooyooyin, isla mar ahaantaana ka dhaadhicinaysa in haweenayda kartida badani ay haysato fursado badan oo ay tahay inay ka faa’idaysato, wakhtigeeda qaaliga ahna aysan ku luminin ka bedelka xafaayada ilmaha yar,
Isku soo wada duub… Hadii aad rabto inaad noqoto “HOOYO”, xasuusnoow inay jiraan waxyaabo badan oo aynaan isku-wada haysan karin, sida inaad rabto inaad noqoto hooyo, isla mar ahaantaana aad ku noolaato qaab nololeedkaagii hore, waxaa jira waxyaabo badan oo ay tahay inaad ka tanaasusho ama ay tahay inaad dib u dhigato.
Haddii aad rabto inaad hooyo noqotid, wax dhib ah kuma jiro in aad waxbarashadaada dib u dhigto, in aad shaqadaadu si ku meel gaar ah u joojiso, iyo in aad bedesho qaab nololeedkaagii hore, maxaa yaalay waxaad kartidaada iyo xeeladaadaba iskugu gaynaysaa wax ka weyn arimahan.
Haddii aad go’aansato inaad hooyo noqotid, fadlan jooji ka qoomamaynta wixii tagay, maxaa yeelay qoomamayntaadu waxay isu bedeli kartaa ciil qarsoodi ah oo ku wajjahan dhalaankaaga, runtii, hooyooyinka qaar ayaa qoomameeya, iyagoo ku cel-celiya “hadii ay sidani dhici lahayn, waxaan ahaan lahaa sidan…” iyagoo raba inay farxad la’aantooda ku eedeeyaan qof kale, haba ugu horreeyo dhalaankeeda.
Mana habboona in dhalaanka loo jeediyo dhaleecayn, sababtoo ah waxay adduunkan joogaan iyagoon garanayn sababta ay u joogaan, goorta ay joogaan, sida ay u joogaan, iyo halka ay ka joogaan.
Ma Fududa Inaad Hooyo Noqotid
Waxaa laga yaabaa inaad wax badan lumin doonto haddii aad go’aansato inaad hooyo noqotid, taa bedelkeeda waxaa jira waxyaabo badan oo aad kasban doonto intaad ku guda jirto geedi socodka hooyonimada. Hooyanimadu waa safar waayo-aragnimado oo aad ku baran doonto dulqaadka, dareenka, iyo jaceylka, kaana dhigi doona (marka ay u yar tahay) qof wanaagsan.
Xilkan cusub ee aad qaadday wuxuu kaa dhigi doonaa qof adag, wuxuuna kugu riixi doonaa inaad ka tanaasushu ama aad yarayso (marka ay u yar tahay) caadooyinkaaga xun-xun, waxaadna noqon doontaa hooyo u taagan difaacidda diinteeda iyo qoyskeeda.
Dabcan marxalada dhalmada ka dib waxaad noqon doontaa “HOOYO” laakiin se taasi ma damaanad qaadi karto inaad noqoto hooyo fiican,
Sidaa darteed waxaa hooyooyinka la gudboon inay bartaan xirfado badan oo kala duwan oo ku saabsan xidhiidhada qoyska, si ay uga miro-dhaliyaan yoolalkooda ku aadan qoyska.