Madax-adayga ubadka waa mawduuc si weyn ay u daneeyaan hooyooyinka gaar ahaan marka ay taagan tahay xalkeeda, hooyooyin badanna ayaa la ildaran madax-adayga ubadkooda, cabashada joogtada ah, iyo oohinta xad-dhaafka ah, waxaana laga yaabaa mararka qaar inaan aragno iyagoo si xun dhulka isku tuuraya, ama iyagoo madaxooda gidaarka (darbiga) ku dhufanaya ama ku garaacaya, iyo dhaqamo kaloo badan oo khaldan oo u baahan in la saxo oo ay badanku leeyihiin ubadka madaxa-adag.
Haddaba, waa maxay madax-adaygu?, ma dhaqan dabiici ah baa?, goorma ayuuse bilaabmaa madax-adayga ubadka?, jawaabaha su’aalahan waxaynu ka ogaan doonnaa qaybaheena xiga ee maqaalkan.
Waa Maxay Madax-adaygu?
Madax-adaygu waa hab-dhaqan caan ka dhex ah carruurta qaar, isagoo uu ilmuhu diidayo in uu sameeyo wax la faray (amray) ama uu ku adkaysanayo in uu sameeyo wax laga reebay.
Madax-adaygu sidiisaba waa “ka noqosho la’aan” xataa haddii ay adag tahay, waxaana laga yaabaa ilmuhu inuu hab-dhaqankan yeesho muddo gaaban ama marxalad gaar ah oo soo wajjahday, ama waxay noqon kartaa mid joogto ah oo ilaa waligeed jirta.
Madax-adayga Ubadka Ma Hab-Dhaqan Dabiici Ah Baa?
Madax-adaygu waa hab-dhaqan dabiici ah oo ay ubadku ku dhashaan, ilmo kastaana waxa uu leeyahay qaab u gaar ah oo uu ku cabiro rabitaankiisa iyo waxa uu damacsan yahay marka loo eego shakhsiyadiisa, waxaana laga yaabaa ilmuhu inuu hab-dhaqankan madax-adayga ah u adeegsado, si uu u gaaro danihiisa, mar allaalana marka uu ku guulaysto inuu hab-dhaqankan madax-adayga ah u adeegsado si uu u gaaro danihiisa iyo ujeedooyinkiisa, waa mar kaste uu sii madax-adkaado, maxaa yeelay wuxuu haystaa waddada ugu fudud ee uu ku gaari karo ujeedooyinkiisa.
Xaalado kale, waxaa laga yaabaa ilmuhu inuu ku dhaqmo hab-dhaqankan isagoo ku dayanaya dabeecadda dadka kale (ha yaraadaan ama ha waynaadaan), si uu u diido wax uusan rabin inuu sameeyo ama uu u gaaro wax uu rabo inuu helo.
Goorma Ayuu Bilaabmaa Madax-adayga Ubadka?
Madax-adayga ubadka wuxuu bilaabmaa xilliyada hore ee caruurnimada, taas oo ah da’da u dhaxaysa 18-24-ka bilood ee ugu horraysa, waxaana dhici karta in uu meesha ka baxo hab-dhaqankani muddo ka dib, amaba waxaa dhici karta in uu sii jiro oo uu noqodo mid ka mid ah shakhsiyadda qofka inta uu nool yahay, iyadoo loo eegayo deegaanka qoyska, deegaanka bulshada, iyo hidde-raacayaasha kala duwan ee ka qayb qaata sii socoshadeeda ama dabar-go’eeda si uun ama si kaleba.