Talooyin Ku Aadan Maydhiga Hore Ee Dhalaanka

Maydhiga hore ee dhalaanka ayaa laga yaabaa inay walaac iyo cabsi yar ku keento waalidiinta gaar ahaan kuwa ku cusub dhalmada.

Maydhiga hore ee dhalaanka waa waayo-aragnimo cusub oo ay waalidiintu korodhsadaan, saasooy tahayna wadata wel-welkeeda, maadaama uu ilmuhu (dhalaanku) aad u jilicsan yahay, lagana baqayo inuu hargab ku dhaco ama si kale ay u saameeyaan biyaha.

Goorma Ayaa Dhalaanka Loo Maydhayaa, Maydhigiisa Ugu Horreeya?

Dhawrkii sano ee la soo dhaafay, hay’adaha caalamiga ah ee ku takhasusay daryeelka caafimaadka carruurta waxay beddeleen wakhtiga ugu horreeya ee loo maydho dhalaanka. Halkii ay ka ahayd markii hore in dhalaanka la maydho saacad ama labo saac ka dib dhalmada, haatan qaar badan ayaa bedelay hab-raacaas.

Ururka Caafimaadka Adduunka (WHO) waxa ay ku talisay in dib loo dhigo maydhiga (qubeyska) ugu horreeya ee dhalaanka ilaa 24 saacadood ka dib dhalmada, ama la sugo ugu yaraan 6 saacadood haddii maalin buuxda aanay suurtagal ahayn.

Faa’iidooyinka Ay Leedahay Dib U Dhigista Maydhiga Hore Ee Dhalaanka

Waa kuwan qaar ka mid ah faa’iidooyinka ay leedahay dib u dhigista maydhiga (qubayska) hore ee dhalaanka:

1. Ka Fogaanshaha Keenista Hargabka

Dhalaanka isla wakhtigii uu dhashaaba loo maydhaa waxa laga yaabaa inuu aad ugu dhow yahay inuu hargab qaado oo uu yeesho hypothermia marka loo eego dhalaanka kale ee loo maydho saacado ka dib dhalmadiisa.

2. Ka Fogaanshaha Carqaladaynta Xidhiidhka

Maydhiga (qubeyska) hore ee dhalaanka waxay carqaladayn kartaa xidhiidhka u dhaxeeya dhalaanka iyo hooyada, iyadoo laga yaabo inay hakat galiso naasnuujinta hore.

3. Ka Fogaanshaha Xanuunada Maqaarka

Vernix, oo ah walax cad, oo daboosha maqaarka ilmaha marka ay dhashaan, waana qoyaan dabiici ah oo ka soo hor-jeeda (lid ku ah) bakteeriyada.

Waxaana lagu taliyaa in qoyaankan dabiiciga ah lagu daayo maqaarka dhalaanka in muddo ah, si ay maqaarkooda jilicsan uga hor-tagaan in uu qallalo oo uu la kulmo bakteeriyada.

Tanina waxay si gaar ah muhiim ugu tahay wiilasha, sababtoo ah maqaarkooda ayaa aad uga nugul caabuqa markii loo eego gabdhaha.

Imisa Jeer Ayay Tahay In La Maydho Dhalaanka Maalintiiba, Todobaadkiiba, Ama Bishiiba?

Dhalaanka sida caadiga ah uma baahna in la maydho maalin kastaa, maadaama ay dhif u yihiin dhididka ama wasakhda.

Sida badanka lagu taliyo, saddex maydhi (qubeys) todobaadkii ilaa iyo inta uu ku jiro sanadka koowaad, maxaa yeelay maydhashada badani waxay qallajin kartaa maqaarka jidhkiisa.