Oohintu waa dhawaqa ugu horreeya ee uu ku dhawaaqo ilmuhu, taas oo uu ku muujinayo jiritaankiisa wakhtiga dhalashada, waana hab isgaarsiineed oo muhiim ah, gaar ahaan xilliga caruurnimada hore.
Hab-dhaqanka oohintu waa hab wax ku ool ah, oo uu ilmuhu ku muujinayo baahiyihiisa jidheed, sida rabitaanka cunto, biyo iyo diirimaad, sidoo kalena uu ku muujinayo dareenkiisa gudaha ah, sida xanaaqa, xanuunka, niyad-jabka, iyo murugada.
Hab-dhaqanka oohintu waxaa loo arkaa inuu yahay mid aan la aqbali karin, marka uu ilmuhu u noqdo dariiqa kaliya ee uu ku helo waxa uu rabo.
Ubadka Ooya, had iyo jeer marka ay yar yihiin waxay sii wadaan barashada jawaabo iyo dhaqamo badan oo ka caawinaya inay ku gaadhaan rabitaankooda iyo codsiyadooda.
Sababta Ka Danbaysa Had Iyo Jeer Inay Ooyaan Ubadku?
Ubadka Ooya badanka waxa sabab u ah tabar darida iyo dulqaadka yarida waalidka, oo ka hor imanaysa rabitaankiisa. Waxaana laga yaabaa in tabar darida iyo dulqaadka yarida waalidka ay ugu wacan tahay, in ilmahani uu yahay ilmaha kaliya ee u dhashay qoyska, ama uu yahay ilmaha keliya ee lab ah, ama uu yahay ilmihii ugu dambeeya ee la dhalay, ama la dhalay muddo dheer ka dib, ama uu soo maray cudurro badan iyo dhibaatooyin caafimaadeed, ka hor inta uusan gaarin heerkan.
Ilmaha had iyo jeer ooyaya, ee ku dhaqma hab-dhaqanka noocaas ah, waxay u badan tahay inuu ku soo koray korriin jilicsan oo dabacsan, oo ku keenaysa inuu noqdo mid daneenaya kaliya rabitaankiisa. Sidaas darteed waa muhiim in ubadka la baraa diidmada iyo ad-adaygnimada, si uu u noqdo ilmo toosan.
Cabdi waa wiil yaroo shan jir ah, laakiin wali wuxuu u dhaqmaa sidii inuu yahay labo jir, wuxuuna la ooyaa sababaha ugu yar, waxaana taas ugu wacan in aanuu garanayn qaab aan oohinta ahayn ee uu wax ku waydiisto, ama uu ku diido, waxayna oohintu u tahay habka kaliya ee uu kula xidhiidho dadka, haday noqon lahayd dalbasho iyo diidmo. Wuxuuna xaqiiqsaday in oohintu ay tahay qaab wax badan lagu gaadho, ama lagu helo. Cabdi markasta oo uu u bogo waxa suuqa yaala sida kubad, biibiilo (buufin) iwm, wuu ooyaa si uu u helo waxa uu u bogay, sidaa si la mid ah, markasta oo loo diido ama laga yareeyo daawshada TV-ga ama telefoonada casriga ah, wuu ooyaa si aan loogu diidin ama aan looga xaddidin, Cabdi mar alla markuu ooyo, waalidkiisa waxay ka tanaasulaan gabi ahaanba waxay ay u diidanaayeen, sidaasina cabdi wuxuu hadafkiisa ku xaqiijiyaa oohintiisa.
Waa Sheeko yar oo male awaal ah oo aan uga go-gol lahaa inaan ku soo dhaweeyo fikradaada ku aadan oohinta ubadka
Gabagabadii
Waa in aan marka hore la soconaa sida xaalku yahay, si aan u ogaano sababaha keenaya oohinta. Waa in aan hubinno in aysan jirin sababo dabiici ah oo ku reexaya ama ku kaxeenaya ilmahan oohinta, sida cudurka iwm.
Haddii sababaha uu u ooyayo ay tahay in ilmuhu uu rabo inuu helo dareenka, daryeelka iyo jacaylka waalidka, Waalidiintu waa inay garwaaqsadaan arrintan oo ay siiyaan jacaylka iyo daryeelka ay u baahan yihiin, waana inay ilmaha fahamsiiyaan oo ay u muujiyaan inay jecel yihiin oo ay daryeelaan. Ilmuhuna waa inuu bartaa in oohintu aanay ahayn habka saxda ah ee lagula xidhiidho dadka kale.