Barbaarinta ubadku waa masuuliyad u baahan waalidiintu inay diiradda saaraan marxalad kasta oo uu marayo ubadka, Gaar ahaan dhalinta ku jirta xilliga qaan-gaarnimada, iyagoo u baahan qof gacanta qabta oo caawiya.
Waalidiintu waa inay ka taxadaraan oo ay ogaadaan sida ay ula dhaqmi lahaayeen dhalinta ku jirta xilliga qaan-gaarnimada,si mustaqbalka loo dhiso qof dheeli tiran jir ahaan iyo maskax ahaanba, lagana fogaado aafooyinka qalafsanaanta iyo hab-fikirada khaldan.
La macaamilka da’yarta waxay u baahan tahay dulqaad, karti iyo faham heersare ah, haddaba maxaad ka qabataa xaaladaha qaar ee keena cadhada joogtada ah?
Waxaa hubaal ah in haddii waalidiintu ay si khaldan ula dhaqmaan dhalinta ku jirta xilliga qaan-gaarnimada, ay dhalan karto cawaaqib xumo. Waxayna noqon kartaa mid ka mid ah sababaha ka qaybqaata sii xumaynta dhibaatooyinka halkii ay xallin lahaayeen.
Dabeecadaha Qaar Ee Ay Leeyihiin Dhalinta Ku Jirta Xilliga Qaan-Gaarnimada
Hoos waxa ku xusan qaar ka mid ah tusaalooyinka noocyada hab-dhaqanka ee ay waalidiintu ka walaacsan yihiin:
- Wiilkaygu ama gabadhaydu isagoo ama iyadoo xanaaqsan ayuu guriga ka baxay, misna si xoog leh ayuu albaabka u dhuftay isagoo walibana leh, “Ma awoodid inaad iga hor joogsato inaan arko asxaabtayda.
- Wiilkaygu ama gabadhaydu talo kaste aan siiyo way iska indha tiraan, iyaga oo naftooda ku qanacsan.
- Wiilkaygu ama gabadhaydu waxay guriga ku soo noqdaan iyagoo xidhan maryo layaab leh.
- Wiilkaygu ama gabadhaydu waxay maalintii oo dhan seexdaan guriga, iyagoo dayacay waajibkoodii diineed iyo mid koodii dunyeed.
- Wiilkaygu ama gabadhaydu waxay soo noqdaan goor dambe oo habeen ah, haddii aad sababta waydiisana, way cabanayaan waxayna ku doodayaan inaysan guriga ka helin wax xiiso leh oo ay qabtaan.
- Wiilkaygu ama gabadhaydu waxay dhaleeceeyaan qaabka aan u fikirno, u hadalno, u labisano, iyo asxaabta aannu leenahay.
- Wiilkaygu ama gabadhaydu waxay diidaan inay sii wadaan wada hadalka waxayna isku dayaan inay sameeyaan isku day kasta oo ay ku soo afjaraan wada-hadalkaas iyagoo muujinaya cadho.
Dabeecadahan hore ee aan xusnay, waxay u taagan yihiin tusaalayaasha ugu caansan ee la yaqaan isla mar ahaantaana la filayo in ay qoysasku badankoodu la kulmaan maalin kasta marka ay la macaamilayaan dhalinyarada, badankooduna aysan awoodin inay wax ka qabtaan.
Waa Maxay Sababta Ay Waalidiintu Ugu Adag Tahay Inay La Macaamilaan Dhalinta Ku Jirta Xilliga Qaan-Gaarnimada?
Dhibaatooyinka ay waalidiintu iyo barayaashuba (macalimiinta) ka cawdaan ma aha kuwo gebi ahaanba sabab u ah khaladaadka ku dhaca hab-dhaqanka dhalinta, ee waxaa ugu wacan arrimo iyo xaalado dibadeed oo ay ugu muhiimsan yihiin 2-dan:
- Isbeddellada degdega ah ee jidheed.
- Isbeddellada xiriirka bulshada iyo asxaabta, iyada oo ay hoos u dhacayso doorkii ay waalidiintu ku lahaayeen dhalinta.