Garaacista ubadka waa mawduuc si weyn looga hadlo. Khubarada ka hadla arimaha ubadka intooda badani waxay ku taliyaan in laga soo horjeedsado ciqaabaatka jidheed, laakiin waalidiinta qaar waxay aaminsan yihiin garaacista ubadka inay tahay xeelad edbin oo waxtar leh, halka waalidiinta qaar kalena ay qirtaan inay garaaci jireen ubadkooda mar-mar, gaar ahaan marka ay dareemayaan daal iyo diiqad badan, si kastooy tahayba, dhammaan waalidiinta waxay u baahan yihiin inay ogaadaan cawaaqib xumada ka dhalan karta ciqaabta jidheed, oo ay si dhow uga fiirsadaan.
Waxaa jira habab badan oo ka mid ah barbaarinta ubadka, oo ay ka mid yihiin: diidmada, garaacista, aamusnaanta, doodda, canaanta, qaylada, iyo qaar kale, waxaana laga yaabaa in habka ugu adeegsiga badan ay tahay garaacista, iyadoo loo arko in ay tahay habka ugu wax tarka badan, laakiin hadii aad dhan kale ka eegto, habkani wuxuu leeyahay cawaaqib xun, shareecadeenuna ka may dhigin mid iska furan, ee way xaddiday, si ay u ilaaliso xuquuqda naf kastaa oo bini-aadam ah.
Waa Maxay Sababta Waalidiinta Ku Keenaysa Garaacista Ubadka
Mararka qaar, waalidiintu waxay ubadkooda u garaacaan quus darteed. Marka uu ilmuhu si xun u dhaqmo ama uu sameeyo fal xun si isdaba joog ah, waalidiinta waxaa laga yaabaa markaa inay dareemaan niyad-jab iyo samir la’aan, badankoodana ma garanayaan waxay sameeyaan, waxaana laga yaabaa inay is-yidhaahdaan, “Waxay u muuqataa in aanay jirin waddo kale, oo aan ka ahayn garaacista”.
Haddii aan la helin istaraatiijiyad edbin ah oo waxtar leh oo habboon, waxaad dareemi in garaacistu ay tahay doorashada ugu fiican. Inkastoo garaacista ubadka ay bedeli karto dabeecadda ilmaha muddo gaaban, marka laga yimaado marar dhif ah mooyee in saameyn togan ay ku yeelato mustaqbalkiisa fog, Hadana daraasaduhu waxay muujinayaan in garaacistu aanay waxtar badan u lahayn ubadka, oo ay ku keeni karto waxyeello saameenaya korriinkooda.
Waalidiintuna waxaa laga yaabaa inay ku tiirsanaadaan garaacista, si ay u xalliyaan ama ay u hagaajiyaan dabeecadda ubadkooda, iyaga oo aan isku dayin xeelado kale oo edbin ah, ama aanay siinin doorashooyin kale oo bedel ka ah khaladaaka ay sameeyeen.
Mid ka mid ah sababaha ugu badan ee keena garaacista ubadka, waa cadhada ama dareen la’aanta. Waalidku waxa laga yaabaa in uu ka niyad jabo hab-dhaqanka ubadkiisa oo uu yidhaahdo “Ma rumaysan karo waxan inaad samaysay!” waxaana laga yaabaa inay garaacaan ubadkooda iyagoon ka fikirin.
Haddii aadan aqoon siyaabo kale oo aad u edbiso ubadkaaga, garaacistu waxay noqon kartaa habka koowaad ee aad wax ku edbinayso, waxayna noqon kartaa xal ku meel gaar ah, laakiin garaacistu xalin mayso dhibaatada ama ma baranayso ubadkaaga inuu si wanaagsan u dhaqmo.
Waalidiin badan ayaa ka qoomameeyay garaacista ubadkooda. Iyadoo ay dhaawac badan u geysatay xidhiidhka labadooda ka dhexeeya.
Gabagabadii
Garaacistu waa lama huraan, marka ay taagan tahay barbaarinta ubadka, laakiin se waa inaysan u horseedin dhaawac maskaxeed iyo mid jireedba.
Saas oo ay tahayna, garaacistu ma aha habka ugu wanaagsan ee lagu edbiyo ubadka, sabatoo ah waxay ubadka ku keeni kartaa saamayn nafsiga ah wakhti gaaban iyo mid dheerba.