Mararka qaar ka waalid ahaan wayna dhibtaa oohinta uu ooyo dhalaanka, waxaana isku daynaa inaan aamusino inta karaankeena ah, laakiin waxaa dhacda xaalado badan in aan garan wayno sababta uu la oynayo, waana dhibaato soo wajjahda waalidiinta qaar, waxaana waalidiinta mararka qaar ku dhacda in ay dawakhaan isla mar ahaantaana ay xanaaqaan, dhibaatada halkan taagan ayaa ah garasho la’aanta sababta ka danbaysa oohinta dhalaanka.
Ka hooyo ahaan dhalaankaagu gabi ahaanba adiga ayuu kugu tiirsan yahay; haday ahaan lahayd cuntada, diirimaadka iyo raaxada uu u baahan yahay. Sidaa darteed marka uu oynayo dhalaankaagu wuxuu kuu muujinayaa baahiyihiisa, isagoo kaa dalbanaya dareenkaaga iyo daryeelkaagaba, ileen oohintu waa habka kaliye ee aad ku wada xidhiidhi kartiin, maadaama uusan hadli karin.
Isku soo wada duub, waxaa mararka qaarkood kugu adkaan doonta inaad go’aamiso baahiyaha uu dhalaankaagu rabo, maxaa yeelay baahi kasta uu rabo wuxuu ku muujinayaa “oohin” taasoo mararka qaar keenaysa inaad kala saari kari weydo waxa uu sida saxda ah u rabo, hasa yeeshee wakhti ka dib marka uu koro, waxa uu baran doonaa habab kale oo uu kugu la xidhiidho, sida indho ka hadalka, qaylada, iyo dhoolacadaynta.
Halkan waxaa ah dhawr sababood oo keenta “oohinta dhalaanka” ama in dhalaanku uu ooyo
- Wuxuu La Oynayaa Gaajo Darteed
Gaajadu waa mid ka mid ah sababaha ugu badan ee keenta oohinta dhalaanka, gaar ahaan haddii uu yahay ilmo dhawaan dhashay. Mar kaste oo uu ilmuhu yar yahay da’ahaan, waa mar kaste ay suurtagal tahay in uu oohin badto, sababtoo ah wuu gaajaysan yahay.
Caloosha dhalaankaagu waa ay yar tahay, mana qaadi karto quut (cunto ama cabitaan) badan; taasoo keenaysa wakhti yar ka dib inuu hadana dareemo gaajo.
- Wuxuu La Oynayaa Calool-Xanuun Darteed
Haddii dhalaankaagu uu aad u ooyo, laakiin se uu caafimaad qabo, waxaa laga yaabaa inuu dareemayo calool-xanuun. Waxana laga yaabaa in dhalaankaagu aanu nasanayn oo uu niyad jabsan yahay, isla mar ahaantaana uu diidayo inaad dajjiso, waxaana laga yaabaa in uu feedh qabsado, ama uu jilbaha laabta u keeno.
Halkan sababta saxda ah ee uu la oynayo aad uma cadda, khubarada qaarna ayaa sheega ama u maleeya in ay tahay heer koriimeed oo iska caadi ah.
Halka khubarada qaar ay qabaan in oohinta dhalaanka ay la xidhiidho dhibaatooyin ka dhan ah caloosha. Sida xasaasiyadda, gaaska, calool-istaagga, iwm.
- Wuxuu La Oynayaa Koolkoolin La’aan Darteed
Dhalaankaagu waxa uu u baahan yahay laab-qabasho badan, iyo taabasho jidheed. Sidaa darteed oohintiisu waxay la macno noqon kartaa inuu doonayo in la qaado, lana luliyo, loona heeso, lana siiyo koolkoolin badan, isagoo u heelan inuu helo diirimaadka iyo udgoonka jidhkaaga.
- Wuxuu La Oynayaa Kulayl Ama Qabow Badan Darteed
Marxaladan waxaad hubin kartaa in dhalaankaagu uu aad u kulul yahay ama uu aad u qabow yahay, adiga oo taabanaya calooshiisa ama madaxiisa ama qoorta qaybteeda danbe. Ha na ka qiyaas qaadan heerkulka gacmihiisa ama cagihiisa jidhka intiisa kale; waayo waa wax iska caadi ah inay ka qabow badtaan jidhka intiisa kale.
Kuna ilaali heerkulka qolka dhalaankaaga inta u dhaxaysa 16°C ilaa 20°C, adeegsona “heerkulbeega” si aad ula socoto heerkulka qolka.
- Wuxuu La Oynayaa Xafaayada Oon Laga Bedelin Darteed
Waxaa laga yaabaa in dhalaankaagu uu ka cawdo xafaayadda oo qoyan ama wasakhaysan darteed, se carruurta ama dhalaanka qaar ma diidaan tan ilaa ay dareemaan cuncun mooyee.