Waalidiin badan ayaa laga yaabaa inay is weydiiyaan su’aal ah “sideen u barbaarin karaa ubadkayga, aniga oo aan garaacin ama aan gacanta ka hadalin” taas oo ah waxa aan kaga hadlayno qormadeenan.
Awoowayaashii hore waxay ubadkooda ku barbaarin jireen habab kala duwan, qaarkood waxay ku tiirsanaayeen gacan ka hadalka ama garaacista, si ay u tarbiyadeeyaan. Halka wakhti xaadirkan, waalidiin badan ay ku faana barbaarinta ubadkooda, iyagoo ka madax banaan ama ka fog ciqaabaatka jidheed, taas oo ka duwan qaabkii ay awoowayaashood u soo koriyeen waagii hore.
Si kastaba ha ahaatee, waxaa weli jira waalidiin badan oo ubadkooda garaaca, iyagoo iska dhaadhicinaya ama is mood-siinaya inay ubadkooda si fiican u barbaarinayaan.
Laakiin se barbaarinta saxda ah waa ta isku dheelitiraysa labada arrimood, waxaana halkan ah talooyin bedel ka ah garaacista ubadka:
- In la kala saaro garaacista, iyo ciqaabta
Ciqaabtu waa hab barbaarineed, ujeedkeeduna waa in lagu edbiyo ilmaha, si aanuu mar labaad ugu noqonin khaladaadkii hore ee uu sameeyay, halka garaacistu lagu tilmaamo in ay tahay ama ay u dhawdahay aargoosi, taasina waa wax ka fog barbaarinta suuban.
Waalidiin badan ayaan kala soocin garaacista, iyo ciqaabta, ilaa xadka ay ubadkoodu ku korinayaan hab aan ahayn habkii saxda ahaa, taas oo gacan ka geysanaysa xoojinta fikradda khaldan ee ilmaha.
Sidaa darteed, waalidiintu waa inay ogaadaan farqiga u dhexeeya garaacista, iyo ciqaabta.
- In la isku dheelitiro hadalka kiisa dabacsan iyo kiisa qallafsan
Waalidiintu waa in ay isku dheelitiraan hadalka kiisa jilicsan iyo kiisa adag, waxaana mararaka qaar lagu taliyaa in loo badto dhanka adag, sidii ay awoowayaashood yeeli jireen, iyada oo aan la illoobayn dhinaca debecsanaanta hadalka iyo qancinta, si uu ilmuhu u koro isagoo baranaya hadalka kiisa dabacsan iyo kiisa qallafsan, oo uu dadka ula dhaqmo si caqli leh oo dheeli tiran.
- In la raadiyo xeelad kale oo ka soo horjeeda garaacista
Garaacistu waa mid ka mid ah hababka ugu saamaynta weyn ee ka taga cawaaqib xumo. Hadday ahaan lahayd dhinaca jireed ama mida nafsiyeed, haddii ay dhaafto xadkii loogu talagalay.
Waxaana laga yaabaa inay u horseeddo burburinta maskaxda ilmaha, taasoo saamaynaysa mustaqbalkiisa fog iyo tan dhawba.
Sidaa darteed waalidiintu waa inay raadiyaan habaka ugu wax tarka badan ee ku habboon edbinta ubadkooda, iyo ciqaabaadka kale ee badali kara booska garaacista, haday noqon lahayd aamusnaan, canaan, iyo xadidaad ama xannibaadba.
Guntii iyo Gabagabadii
Waxaan rajaynayaa inaa soo koobay jawaabta su’aashii ahayd “sideen u barbaarin karaa ubadkayga, aniga oo aan garaacin” waxaana waalidiinta la gudboon inay raadiyaan xalal bedel ka ah garaacista ubadka, isla mar ahaantaana ay isku dheelitiraan.