Ma is-weydiisaa su’aashan ah, “Sideen ilmahayga uga dhigaa kuwo maqla hadalkayga ama erayadayda?”. Carruurtaadu miyay ku maqlaan marka ugu horeysa ee aad wax ka codsato? Haddaysan jawaabtaadu “HAA” ahayn, sii wado akhriska maqaalkan si aad uga bogato xaaladaha qaar ee ay caruurtaadu ku maqli karaan. Caruurtaadu si dhab ah ayay ku dhegaysan doonaan marka ay idin dhex taalo ixtiraam iyo xushmad.
Sideen Ilmahayga Uga Dhigaa Kuwo Maqla Hadalkayga
Halkan waxaa ah affar tilmaamood oo ku saabsan sidii aad caruurtaada uga dhigi lahayd kuwo ku maqla, misna ku ixtiraama:
- Ixtiraam Carruurtaada
Carruurtu waxay wax ka bartaan ficilada iyo hab-dhaqanada waalidiintooda, waxayna u badan tahay inay ku daydaan oo ay qaataan hab-dhaqankooda.
Markaad ixtiraam u muujiso carruurtaada, waxay iyaguna sidoo kale kuu muujin doonaan ixtiraam. Loomana baahna halkan in caruurta la gaarsiiyo awood ka saraysa awooda waalidka, ee waa in aan la yaraysan, hoosna loo dhigin, lana liidin, ama aad loo dhaleecayn. Hase yeeshe, waa in la dhagaysto ra’yigooda, la ixtiraamo iyo in laga doodo arimaha qaar.
- Tusaale U Noqo
Carruurta badankoodu waxay iska eegaan waalidiintooda inay ogaadeen iyo in kale. Waxayna nuugaan oo ay qaataan wax kasta oo ay arkaan. Haddaba, waalidiintu waa inay ubadkooda u noqdaan kuwo ku dayasho mudan, waana inay muujiyaan oo ay raacaan hab-dhaqanada ay jeclaan lahaayeen inay carruurtooda ku arkaan, aad bayna u fududaan doontaa carruurtaadu inay ku maqlaan markay arkaan inaad samaynayso waxaad tidhaahdoba.
- Ixtiraam Lamaanahaaga
Haddii aad rabto in ilmahaagu uu ku maqlo oo uu ku ixtiraamo, isla mar ahaantaana aad rabto inuu ku daydo dhaqamadaada, ixtiraam u muuji lamaanahaaga (xaaskaaga), taasoo ku dhiirigalinaysa caruurta inay ku ixtiraamaan oo ay maqlaan hadalkaaga.
- La Sheekayso Ilmahaaga
Mid ka mid ah jawaabaha ugu wanaagsan ee su’aasha ah “Sideen ilmahayga uga dhigaa kuwo maqla hadalkayga?” waa inaad la shaykaysato ilmahaaga, tusaale ahaan, u sheeg oo kala shaykayso maalmahaagii dugsiga, hiwaayadahaaga, riyadaada iyo himilooyinkaaga. Markaa iyada ah ilmahaagu aad buu kuugu fur-furnaan doonaa, wuuna maqli doonaa hadaladaada.